Fevralın 7-nə təyin edilmiş növbədənkənar Prezident seçkiləri ilə əlaqədar Mərkəzi Seçki Komissiyası (MSK) bu gün Şəkidə Ali Məhkəmə və apellyasiya məhkəmələri ilə birgə “Seçki mübahisələrinin məhkəmə qaydasında həlli” mövzusunda regional seminar-müşavirə keçirilib.
“Report”un Şimal-qərb bürosunun məlumatına görə, seminar-müşavirədə region üzrə apelyasiya məhkəmələrinin hakimləri və 17 dairə seçki komissiyalarının sədrləri iştirak edib.
Şəki Apellyasiya Məhkəməsinin sədri Nuru Quliyev “Prezident seçkilərində vətəndaşların seçki hüquqlarının pozulması ilə əlaqədar şikayət və müraciətlərin seçki komissiyalarına verilməsi və onların araşdırlması qaydaları” haqda çıxış edib, iştirakçıların suallarını cavablandırıb.
MSK üzvü İlkin Şahbazov “Prezident seçkilərində seçki hüquqlarının müdafiəsi ilə bağlı qanunvericiliyin məhkəmələr tərəfindən tətbiqi-təcrübəsi və məhkəmə seçki hüquqlarının müdafiəsi ilə bağlı işlər üzrə icraat”ı istiqamətində məlumat verib, slayd və sənədlərlə izahatlar aparılıb.
Sonda iştirakçıları maraqlandıran suallar cavablandırılıb.
Qeyd edək ki, sözügedən layihənin reallaşdırılmasında başlıca məqsəd qarşıdan gələn seçkilərin yüksək səviyyədə təşkil olunub, azad, ədalətli və şəffaf keçirilməsini təmin etməkdir.
Seminar-müşavirənin gedişini ATƏT-in müşahidəçiləri də izləyib.