Bakıdakı Rus evinin Ədəbi klubu çərçivəsində xarici poetik klublar və poeziyasevərlərlə telekörpü təşkil olunub. İştirakçılar Özbəkistan, Qazaxıstan, Azərbaycan və Rusiya şairlərinin şeirlərini rus dilində oxuyublar.
Rusiya İnformasiya-Mədəniyyət Mərkəzindən (RİMM) AZƏRTAC-a bildirilib ki, tədbirdə Almatı Rus evinin fəalları, Daşkənd Rus Mədəniyyət Mərkəzindən gənc şairlər, Çeçenistan Dövlət Pedaqoji Universitetinin ədəbi klubunun sədri Xava Camurzayevanın rəhbərliyi ilə klubun iştirakçıları, Dağıstanın Xalq şairəsi və Dağıstan Yazıçılar İttifaqının sədri Marina Əhmədova, Rusiya və Dağıstan Yazıçılar İttifaqının üzvü, “Ədəbi Dağıstan” respublika jurnalının baş redaktoru Murad Əhmədov iştirak ediblər.
Tədbir dəyirmi masa formatında keçib, klubun Bakıdan olan iştirakçıları Azərbaycanın Xalq şairi Nəbi Xəzrinin şeirlərini oxuyublar. Tədbirdə atalarının ən sevdiyi şeirlərini rus dilində oxuyan müəllifin oğlu Arzu Babayev və qızı Pərixanım Əliyeva iştirak ediblər. Şairin yaxınları gənclər arasında bu cür tədbirlərin keçirilməsinin vacibliyini qeyd ediblər.