Ərbil Beynəlxalq Hava Limanının (İraqın şimalında muxtar bölgə olan İraq Kürdüstanının inzibati mərkəzi) ərazisində yerləşən ABŞ hərbi bazası pilotsuz təyyarə ilə hücuma məruz qalıb. Bu barədə “Shafaq News” portalı mənbəyə istinadən məlumat yayıb.
Onun sözlərinə görə, partlayıcı maddələrlə yüklənmiş pilotsuz təyyarə hava limanına yaxınlaşarkən hava hücumundan müdafiə sistemləri tərəfindən vurulub və hədəfə çatmayıb. Hadisə şahidləri bildiriblər ki, partlayış səsi obyektin olduğu tərəfdən eşidilib. Hadisənin başqa təfərrüatları barədə məlumat verilməyib.
Bundan əvvəl şiə birləşmələri Telegram kanalında yaydıqları bəyanatda ABŞ-a Suriya və İraqda silahlı əməliyyatların sayını artıracaqları barədə xəbərdarlıq etmişdilər, çünki “Amerika İsrail ordusuna hərbi yardım göstərməkdə davam edir”. (Tass)