Amerika prezidenti Co Bayden İsrailin baş naziri Benyamin Netanyahunun fikir ayrılığına baxmayaraq, Fələstin-İsrail münaqişəsinin iki dövlət əsasında həllində israrlıdır. Bu barədə jurnalistlər üçün keçirdiyi növbəti brifinqdə Ağ Evin Milli Təhlükəsizlik Şurasının (MTŞ) strateji kommunikasiyalar üzrə koordinatoru Con Kirbi bildirib.
Ona Netanyahunun iki dövlət prinsipinə qarşı çıxması kontekstində Yaxın Şərq münaqişəsinin həlli ilə bağlı dövlət başçısının mövqeyi barədə sual verilib. “Prezident hesab edir ki, iki dövlətli həll Fələstin xalqı və İsrail xalqı üçün ən yaxşı variantdır”, – Kirbi bildirib.
O, İsrail baş nazirinin bununla razılaşmadığını şərh etməyib. “Mən sizə deyə bilərəm ki, prezident hələ də iki dövlətli həllə inanır, o, bizim buna nail ola biləcəyimizə və bunun işləyə biləcəyinə əmindir”, – Ağ Evin sözçüsü əlavə edib.
Yanvarın 18-də İsrailin baş naziri bildirib ki, ölkəsi Fələstinin radikal HƏMAS hərəkatı üzərində qəti qələbə qazanana qədər əməliyyatı davam etdirəcək. Yəhudi dövlətinin Nazirlər Kabinetinin rəhbəri Fələstin dövlətinin yaradılması ideyasını rədd edib və öz mövqeyini Amerika tərəfinin diqqətinə çatdırdığını bildirib. (Tass)