Yəmənin Ənsar Allah hərəkatından olan husi üsyançıları Ədən körfəzi və Bab əl-Məndəb boğazında ABŞ Hərbi Dəniz Qüvvələrinə məxsus gəmilərə qarşı hərbi əməliyyat elan ediblər. Bu barədə hərəkatın hərbi nümayəndəsi Yəhya Səriyanın Telegram-kanalında yazdığı bəyanatda deyilir.
“Bu gün Ədən körfəzi və Bab əl-Məndeb boğazında ABŞ-ın bir neçə esminesi və hərbi gəmisi ilə toqquşma baş verib. Bu gəmilər ABŞ-ın iki ticarət gəmisini mühafizə edir. Əməliyyat nəticəsində ABŞ hərbi gəmisi, iki ABŞ ticarət gəmisi birbaşa vurulub. Gəmilər geri çəkilməyə və geri qayıtmağa məcbur edilib”, mətndə deyilir.
Açıqlamaya görə, “iki saatdan çox davam edən toqquşmada” husilər “bir neçə ballistik raketdən” istifadə ediblər, bəziləri Amerika tərəfinin onları tutmağa cəhd etmələrinə baxmayaraq, “hədəflərinə çatıb”. (Tass)