2023-cü ildə “Azərtütün” Açıq Səhmdar Cəmiyyətinin (ASC) respublikamızın şimal-qərb bölgəsində fəaliyyət göstərən emal məntəqələrində 1100 ton quru tütün istehsal olunub. Bu, əvvəlki illə müqayisədə 355 ton çoxdur.
Bu barədə AZƏRTAC-ın bölgə müxbirinə Səhmdar Cəmiyyətdən məlumat verilib.
Qurumdan bildirilib ki, ASC tərəfindən ötənilki mövsümdə şimal-qərb bölgəsinə daxil olan Balakən, Zaqatala, Qax, Şəki və Oğuz rayonlarında 620,1 hektar sahədə “Virciniya botaniki” növlü tütün əkilib. Bunun 62,7 hektarı şirkətin özünə aid, 557,4 hektarı isə fermerlərə məxsus sahələr olub. Tütün istehsalı ilə əlaqədar cəmiyyət tərəfindən həmin rayonlarda 77 fermerlə müqavilə bağlanılıb. Mövsüm ərzində cəmiyyətin Balakən, Zaqatala, Qax və Şəki rayonlarında fəaliyyət göstərən tütün istehsalı və emalı məntəqələrinə fermerlərdən 7 min 331,8 ton yaşıl tütün kütləsi daxil olub. Yaşıl tütün istehsalı əvvəlki illə müqayisədə 2 min 788,6 ton artıb.
Mövsüm ərzində ASC-nin emal məntəqələri Şəki rayonunda istehsalçılardan 3736,8 ton, Qaxda 1318,8 ton, Zaqatalada 1040,6 ton, Balakəndə 774,5 ton, Oğuz rayonunda isə 461,2 ton yaşıl tütün kütləsi qəbul edib.