Milli Azərbaycan Tarixi Muzeyinin kitabxanasında “Azərbaycan” jurnalının müxtəlif illərdə nəşr olunmuş nüsxələri qorunur.
Bu barədə AZƏRTAC-a muzeydən məlumat verilib.
“Azərbaycan” jurnalının yaranmasından 101 il ötür. “Azərbaycan” ədəbi-bədii jurnalının ilk nömrəsi Xalq Maarifi Komissarlığının 1922-ci il 24 oktyabr tarixli kollegiya iclasının qərarı ilə 1923-cü ildə “Maarif və mədəniyyət” adı ilə nəşr olunub. Jurnalın ilk redaktoru görkəmli ədib və maarif xadimi Tağı Şahbazi təyin edilib. Respublikanın ictimai-siyasi və ədəbi-mədəni həyatında baş verən hadisələrlə əlaqədar jurnalın adı 6 dəfə dəyişdirilib. 1953-cü ildən bu günə qədər öz məzmun və qayəsinə görə “Azərbaycan” adı altında oxuculara təqdim edilir.
Nəşrdə yazıçı, publisist Tağı Şahbazi, publisist Ruhulla Axundov, ədəbiyyatşünas, tənqidçi Mustafa Quliyev və başqa ziyalılar redaktorluq ediblər.