Tacikistan İstanbulda katolik kilsəsində baş verən atışmada əli olmaqda şübhəli bilinərək saxlanılan respublika vətəndaşının kimliyini aydınlaşdırmaq üçün Türkiyəyə sorğu göndərib, Ankaradakı səfirlik hadisənin baş vermə şəraitini aydınlaşdırır. Bu barədə TASS-a Tacikistan Xarici İşlər Nazirliyindən məlumat verilib.
“İstanbuldakı kilsədə cinayət törətməkdə şübhəli bilinən Tacikistan vətəndaşının şəxsiyyətinin müəyyən edilməsi üçün Türkiyə dövlət orqanlarına rəsmi sorğu göndərilib. Səfirliyimiz bütün halların aydınlaşdırılması üçün Türkiyə Respublikasının hüquq-mühafizə orqanları ilə sıx əlaqə saxlayır”, – deyə Xarici İşlər Nazirliyinin nümayəndəsi bildirib.
Hadisə yanvarın 28-də yerli vaxtla saat 11:40 radələrində Sarıyer rayonundakı Müqəddəs Məryəm katolik kilsəsində baş verib. İki maskalı basqınçı xidmət zamanı atəş açaraq 1972-ci il təvəllüdlü Türkiyə vətəndaşını öldürüb. Daha sonra Türkiyənin daxili işlər naziri Əli Erlikaya jurnalistlərə bildirib ki, polis atışmada şübhəli bilinən 47 nəfəri, o cümlədən Rusiya və Tacikistan vətəndaşlarını saxlayıb. (Tass)