Elm və Təhsil Nazirliyi Botanika İnstitutunun Mikologiya şöbəsinin müdiri Dilzarə Ağayevanın “Azərbaycanda meşə ağaclarının göbələkləri, onların taksonomiyası və filogeniyası” kitabı işıq üzü görüb.
Bu barədə AZƏRTAC-a institutdan məlumat verilib. Bildirilib ki, kitabın elmi redaktoru Botanika İnstitutunun direktoru Səyyarə İbadullayeva, rəyçiləri isə professorlar Elşad Hüseynov və Şakir Qasımovdur.
Monoqrafiya meşə ağaclarının mikobiotasının növ tərkibi, taksonomiyası və filogeniyasının araşdırılmasına həsr edilib. Nəşrdə Azərbaycanda meşə ağac növlərində təsadüf edilən Ascomycota və Basidiomycota şöbələrinə aid göbələklərin tədqiqi öz əksini tapıb. Həmçinin əsərdə növlərin taksonomik statusu, təsviri, toplanma yeri kimi göstəricilər qeyd edilməklə patogen və potensial patogen növlərin molekulyar yanaşmalarla təhlili təqdim olunub.
Monoqrafiya ağacların göbələk xəstəliklərinə qarşı mübarizə tədbirlərinin hazırlanması üçün elmi əsasları təmin edir. Kitab kənd təsərrüfatı sahəsində çalışan mütəxəssislər, ali məktəblərin biologiya fakültələrinin tələbələri, mikologiya və fitopatologiya üzrə ixtisaslaşmış magistrant, doktorant və tədqiqatçılar üçün nəzərdə tutulub.