Birlikdən AZƏRTAC-ın bölgə müxbirinə verilən məlumata görə, Gəncə şəhər 3 nömrəli tam orta məktəbdə 20 şagirdin iştirakı ilə baş tutan ilk seminar çərçivəsində onlara prioritet peşə ixtisasları, Gəncədə fəaliyyət göstərən peşə mərkəzləri, tədris olunan ixtisaslar, qəbul qaydaları və Azərbaycanda olan peşə ixtisaslarının inkişaf perspektivləri haqqında geniş məlumat verilib.
Layihənin məqsədi Gəncə şəhərində orta ümumtəhsil məktəblərində təhsil alan şagirdlərin peşə təhsilinə maraqlarının artırılması, peşə sahələrinin yaratdığı iş imkanlarının onlara təlqin olunması və bu prioritet sahənin icra ediləcək fəaliyyətlər vasitəsilə hədəf kütləsinə səmərəli şəkildə çatdırılmasıdır.
Layihənin ilk mərhələsi şəhərin daha 6 orta məktəbində məlumatlandırıcı seminarların təşkili ilə davam edəcək. Seminarlardan sonra isə həmin məktəblərdən seçilən şagirdlərin Gəncə şəhərində yerləşən Sənaye və Texnologiyalar üzrə və Ticarət və Xidmət üzrə Gəncə Dövlət Peşə Təhsil mərkəzlərinə səfərləri təşkil olunacaq.