İsrailin baş naziri Benyamin Netanyahu Fələstinin HƏMAS radikal hərəkatının tələbləri ilə bağlı yeni atəşkəs sazişinin bağlanması və Qəzza zolağından girovların azad edilməsi perspektivinə əmin olmadığını bildirib.
“Razılaşmanın olub-olmayacağını dəqiq deyə bilmərəm. Lakin HƏMAS öz aldadıcı tələblərindən əl çəkib yerə enərsə, biz çalışdığımız tərəqqiyə nail olacağıq”, o, CBS telekanalında deyib.
İsrailin baş naziri vurğulayıb ki, yeni razılaşmaların əldə edilməsi üzrə iş davam edir, lakin danışıqların yekunlaşması üçün dəqiq vaxt çərçivəsi verə bilməyib.
Eyni zamanda, ABŞ prezidentinin milli təhlükəsizlik üzrə köməkçisi Ceyk Sallivan NBC telekanalının efirində bildirib ki, Birləşmiş Ştatlar yaxın günlərdə girovların azad edilməsi və Qəzza zolağında müvəqqəti atəşkəslə bağlı danışıqların iştirakçılarının yekun razılaşma əldə edə biləcəklərini gözləyir. (Tass)