Son illərdə bir sıra şəxslər ombudsmana müraciətlər ünvanlayaraq İraq Respublikası və Suriya Ərəb Respublikasında döyüşən silahlı dəstələrin girovluğunda olan yaxın qohumlarının, xüsusilə qadın və uşaqların ölkəmizə qaytarılmasında kömək göstərilməsini xahiş edib.
AZƏRTAC xəbər verir ki, bu barədə Azərbaycan Respublikasının insan hüquqları üzrə müvəkkilinin 2023-cü il üzrə məruzəsində bildirilib.
Diqqətə çatdırılıb ki, müxtəlif vaxtlarda həmin ərizəçiləri qəbul edən ombudsman mövcud problemin araşdırılması, həlli və vətəndaşlarımızın ölkəyə qaytarılması istiqamətində Azərbaycan Respublikasının Xarici İşlər Nazirliyi və digər səlahiyyətli dövlət qurumları ilə əməkdaşlığı davam etdirib.
Bu fəaliyyət çərçivəsində 2023-cü il ərzində 13-ü qadın, 47-si uşaq olmaqla, 60 Azərbaycan Respublikası vətəndaşı Suriyadan ölkəmizə repatriasiya olunub.
Azərbaycan hökuməti tərəfindən görülmüş tədbirlər nəticəsində İraq və Suriyadan ümumilikdə 469 uşaq və qadının repatriasiyası həyata keçirilib. Repatriasiya üzrə fəaliyyətin gücləndirilməsi məqsədilə qanunvericiliyin təkmilləşdirilməsi istiqamətində bir sıra tədbirlər həyata keçirilib.