Qusarda gənc qiraətçilərin “Canlı klassika” beynəlxalq müsabiqəsinin dördüncü regional mərhələsi keçirilib.
Rusiya İnformasiya-Mədəniyyət Mərkəzindən (RİMM) AZƏRTAC-a bildirilib ki, layihənin təşkilatçısı “Canlı klassika” Fondudur. Azərbaycanda layihənin kuratoru Azərbaycanın Rus Gəncləri Assosiasiyasıdır.
Qusar şəhərində təşkil olunan dördüncü regional mərhələ Bakıdakı Rus evinin və Azərbaycanın Rusdilli Tədris Müəssisələrinin Müəllimləri Assosiasiyasının dəstəyi ilə baş tutub.
Gənc qiraətçilər rus və sovet müəlliflərinin əsərlərini Rusdilli Tədris Müəssisələrinin Müəllimləri Assosiasiyasının sədri Lyubov Yakunina, Gəncə və Qərb bölgəsi üzrə Rus İcmasının sədri Dmitri Kozin, Azərbaycan Yazıçılar Birliyinin üzvü, Azərbaycanın Rus Gəncləri Assosiasiyasının İdarə Heyətinin üzvü, Ədəbiyyat klubunun rəhbəri Lalə Həsənovanın daxil olduğu münsiflər heyəti qarşısında oxuyublar.