Kiprin xarici işlər naziri Konstantinos Kombos martın 6-7-də İrəvana səfər edəcək və burada erməni həmkarı Ararat Mirzoyan ilə ikitərəfli münasibətlərin inkişafı və Cənubi Qafqazdakı vəziyyəti müzakirə edəcək. Kipr Xarici İşlər Nazirliyindən verilən məlumata görə, o, respublikanın baş naziri Nikol Paşinyanla da görüşəcək.
“İrəvanda olarkən Konstantinos Kombos Ermənistanın xarici işlər naziri Ararat Mirzoyan ilə görüş keçirəcək, bundan sonra iki nazirliyin nümayəndə heyətləri arasında geniş tərkibdə danışıqlar aparılacaq”, – deyə məlumatda bildirilir. “Müzakirələrdə Kipr və Ermənistan arasında ikitərəfli münasibətlər, Kipr problemi, Dağlıq Qarabağdakı vəziyyət və Ermənistanla Azərbaycan arasında sülh danışıqları müzakirə olunacaq. Bundan əlavə, Avropa İttifaqı ilə Ermənistan arasında münasibətlər, Ukrayna və Yaxın Şərqdəki vəziyyətə toxunulacaq”, – deyə Respublika Xarici İşlər Nazirliyində qeyd ediblər.
Departamentdən bildirilib ki, səfər zamanı “Kiprin xarici işlər naziri Ermənistan prezidenti Vaaqn Xaçaturyan və ölkənin baş naziri Nikol Paşinyan tərəfindən qəbul olunacaq”. (Tass)