Türkiyənin Çanaqqala On Səkkiz Mart Universitetinin rektoru professor Ramazan Cüneyt Erenoğlu və professor Vedat Çalışkan Azərbaycan Dövlət Pedaqoji Universitetində (ADPU) olublar.
Pedaqoji Universitetdən AZƏRTAC-a bildirilib ki, görüşdə ADPU–nun rektoru professor Cəfər Cəfərov, tədris işləri üzrə prorektor Eldar Aslanov, Beynəlxalq əlaqələr şöbəsinin müdiri Günay Məhərrəmova və mütəxəssis Nərgiz Səfərova iştirak ediblər.
Görüş zamanı tərəflər təmsil etdikləri universitetlərin tarixi, strukturu, təhsil proqramları barədə bir-birini məlumatlandırıb, universitetlər arasında əlaqələri inkişaf etdirmək, təcrübə mübadiləsi aparmaq, beynəlxalq proqramlarda və layihələrdə əməkdaşlıq etmək arzusunu ifadə ediblər. Bundan əlavə, ikili diplom proqramı sahəsində mümkün əməkdaşlıq imkanları araşdırılıb və belə əməkdaşlığın qarşılıqlı faydalı olacağı vurğulanıb.
Sonda universitetlər arasında əməkdaşlıq müqaviləsi imzalanıb.