Şəki-Zaqatala Regional Təhsil İdarəsi üzrə respublika fənn olimpiadalarının final mərhələsində iştirak etmək hüququ qazanan şagirdlərlə görüş keçirilib.
Regional Təhsil İdarəsindən AZƏRTAC-ın bölgə müxbirinə bildirilib ki, Şəki şəhər 7 nömrəli tam orta məktəbin akt zalında keçirilən görüşün əvvəlində Dövlət Himni səsləndirilib, şəhidlərin xatirəsi bir dəqiqəlik sükutla yad edilib.
Tədbirdə çıxış edən Şəki-Zaqatala Regional Təhsil İdarəsinin müdiri səlahiyyətlərini icra edən, müdir müavini Günay Mahmudova son illər ölkəmizdə istedadlı şagirdlərin aşkara çıxarılmasına xüsusi diqqət yetirildiyini bildirib, onların bilik və bacarıqlarının inkişaf etdirilməsi istiqamətində məqsədyönlü işlərin görüldüyünü qeyd edib. Müdir müavini fərqlənən şagirdlərə uğurlar arzulayıb, onların gələcəkdə daha böyük müvəffəqiyyət qazanmaları üçün müsabiqə və olimpiadalarda iştirakın əhəmiyyətini vurğulayıb.
Çıxış edənlər ölkəmizdə istedadlı uşaqların müəyyənləşdirilməsi istiqamətində keçirilən müsabiqələrin vacibliyini vurğulayaraq, şagirdlərin əldə etdikləri uğurların ölkənin gələcək inkişafındakı rolundan danışıblar.
Tədbirdə çıxış edən məktəblilər olimpiada və müsabiqələrin təşkilatçılarına təşəkkürlərini bildirib, onların yetişməsində əməyi keçən müəllimlərə minnətdarlıqlarını ifadə ediblər.
Sonda müəllimlərə və şagirdlərə fəxri fərmanlar və hədiyyələr təqdim olunub.
Qeyd edək ki, fənn olimpiadalarının yarımfinal mərhələsində Şəki-Zaqatala regionu üzrə ümumilikdə 860 şagird iştirak edib. Mərhələnin nəticələrinə əsasən, olimpiadaların final mərhələsinə Şəki rayonu üzrə 37, Oğuz rayonu üzrə 14, Qəbələ rayonu üzrə 11, Qax rayonu üzrə 6, Zaqatala rayonu üzrə 4, Balakən rayonu üzrə isə 3 şagird vəsiqə qazanıb.