Bakı metropolitenində Novruz bayramının şənlik proqramı “İçərişəhər” stansiyasında təşkil edilib. Xüsusi tərtibatlı səhnədə Novruz bayramının əsas personajları olan Bahar qız, Keçəl və Kosa, eləcə də digər nağıl qəhrəmanlarının iştirakı ilə təqdim olunan şən səhnəciklər, şeirlər, zarafatlar, sorğu-suallar, dadlı-duzlu söhbətlər, təkcə kiçikyaşlı sərnişinlərə deyil, böyüklərə də xoş anlar bəxş edib.
AZƏRTAC xəbər verir ki, sirk ustalarının nömrələri və uşaqların sifarişi ilə şarlardan hazırlanan fiqurlar stansiyanın vestibülündə bayram ovqatını daha da yüksəldib. Dünya İllüziyaçılar Assosiasiyasının üzvü Anar Əliyev sehrbazlıq proqramı ilə bayram tamaşasına rəng qatıb.
Sərnişinlər Bahar qız, Keçəl və Kosanın müşayiətilə stansiya yolunda nümayiş etdirilən retro vaqonların salonunda gəzərək xatirə şəkilləri çəkdiriblər.
Tədbir boyunca azyaşlı sərnişinlərə Novruz hədiyyələri paylanılıb.
Layihə çərçivəsində “Parni iz Baku” Şən və Hazırcavablar Klubunun veteranı Bəhram Bağırzadə azyaşlı sərnişinlərinə qələmə aldığı kitabları imzası ilə hədiyyə edib.
Novruz qəhrəmanlarının proqramı və Bəhram Bağırzadənin kitab hədiyyələrindən ibarət şou-proqram martın 21-də davam etdiriləcək.