ABŞ administrasiyası Fələstinin radikal HƏMAS hərəkatının təkliflərini, o cümlədən İsraillə ən azı beş il atəşkəsin təmin edilməsini rədd edib.
Həmas Siyasi Bürosunun üzvü Xəlil əl-Hayyanın Associated Press-ə müsahibəsində səsləndirdiyi bu fikirləri şərh edən Ağ Evin Milli Təhlükəsizlik Şurasının (MTŞ) strateji kommunikasiyalar üzrə koordinatoru Con Kirbi Vaşinqtonun bu təşəbbüs əsasında danışıqlara hazır olmadığını təsdiqləyib. ABŞ-ın əl-Hayya tərəfindən irəli sürülən təkliflərin danışıqlar üçün etibarlı başlanğıc nöqtəsi olduğuna inanıb-inanmadığını aydınlaşdırmaq üçün MTŞ rəsmisi “Qətiyyən yox” deyib. Kirbi Vaşinqtondan Nyu-Yorka səfər edərkən ABŞ prezidenti Co Baydenin təyyarəsində jurnalistlərə verdiyi açıqlamada “HƏMAS-ın nəzarəti altında heç bir Fələstin dövləti olmayacaq. Bu, terror təşkilatıdır” deyib. Amerika hökuməti HƏMAS-ı terror qruplaşması kimi təsnif edir.
Eyni zamanda, Ağ Ev nümayəndəsi əmin edib ki, Vaşinqton hələ də tamhüquqlu müstəqil Fələstin dövlətinin yaradılması və onun İsraillə dinc yanaşı yaşaması vasitəsilə Yaxın Şərqdəki münaqişənin həllinə çalışır. “Biz iki dövlətli həllin tərəfdarıyıq. Lakin buna [münaqişə tərəfləri] – israillilər və Fələstin Milli Administrasiyası arasında birbaşa danışıqlar yolu ilə nail olmaq lazımdır”, – Kirbi bildirib. (Tass)