İran prezidenti İbrahim Rəisi İraqın mərkəzi hakimiyyət orqanlarını və kürd muxtariyyətinin rəhbərliyini İsrailə və İranın dövlət sisteminə zərbə vurmaq məqsədi daşıyan qruplara İslam Respublikasına qarşı əməliyyatlar keçirməsinə imkan verməməyə çağırıb. O, bu barədə Tehranda İraq Kürdüstanının prezidenti Neçirvan Bərzani ilə danışıqlar zamanı bildirib.
“Biz gözləyirik ki, İraqın mərkəzi hökuməti və İraq Kürdüstanı hökuməti [İsrail] və antiinqilabçı ünsürlərin bu regionun ərazisindən İrana qarşı fəaliyyətlər üçün istifadə etməsinə icazə verməyəcək”, – Rəisinin mətbuat xidməti onun sözlərini sitat gətirir. O, “bütün antiinqilabçı elementlərin tərksilah edilməsini və İraq ərazisindən çıxarılmasını” tələb edib. İran prezidenti bununla bağlı qeyd edib ki, İraqın təhlükəsizliyi İranın təhlükəsizliyi anlayışından ayrılmazdır.
İran hakimiyyətinin fikrincə, İraq Kürdüstanında məqsəd İranın dövlət sistemini sarsıtmaq olan qruplaşmalar fəaliyyət göstərir. Bu təşkilatlar arasında İslam Respublikasında terror təşkilatları siyahısına daxil edilmiş İran Kommunist Partiyasının kürd qolu Komala da var. Bundan əlavə, Tehranda hesab edirlər ki, İsrailin Mossad kəşfiyyat xidmətinin nümayəndələri Ərbildə fəaliyyət göstərir və İran ərazisində terror aktları təşkil edirlər. (Tass)