AZƏRTAC xəbər verir ki, tədbirdə rəsmi qonaqlar, mədəniyyət və incəsənət xadimləri iştirak ediblər.
Açılış mərasimində çıxış edən “İçərişəhər” Dövlət Tarix-Memarlıq Qoruğu İdarəsinin İdarə Heyətinin sədri Şahin Seyidzadə UNESCO-nun ümumdünya mədəni irs siyahısına daxil edilmiş Şirvanşahlar Sarayı Kompleksində ziyarətçilərə təqdim olunan “Xəzinə” muzey ekspozisiyasının ölkəmizin qədim zərgərlik ənənələrinin və numizmatika irsinin təbliği baxımından mühüm əhəmiyyət kəsb etdiyini qeyd edib. O, bir çoxu ilk dəfə nümayiş olunacaq nümunələrin antik dövrdən XX əsrə qədər böyük bir zamanı əhatə etdiyini bildirib. Sərgilənəcək 100 yaxın eksponatların maddi-mədəni irsimizin daşıyıcısı olduğunu, onlardan ən dəyərlisinin isə eramızdan əvvəl II minilliyə aid tunc kəmər olduğunu söyləyib. Sərgidə, həmçinin müasir numizmatika nümunələri də var.
“AzerGold” QSC-nin İdarə Heyətinin sədri Zakir İbrahimov isə ölkəmizdə milli zərgərlik sənətimizə həsr olunmuş muzey ekspozisiyasının ilk dəfə yaradılmasına diqqət çəkib. Tarixi qala divarları ilə əhatə olunmuş əsrarəngiz İçərişəhərdə qədim dövrlərdə ərsəyə gətirilmiş zərgərlik məmulatları və pul nişanları ilə yanaşı, müasir dövlətimizin iqtisadi qüdrətinin göstəricilərindən biri hesab edilən, ən yeni texnologiyalar əsasında istehsal edilən sikkələrin vahid ekspozisiyada nümayiş etdirildiyini bildirib. QSC sədrinin sözlərinə görə, bu, bir tərəfdən, milli-mədəni dəyərlərimizə hörmət və ehtiramı, digər tərəfdən, keçmiş dövrlərdən formalaşmış milli zərgərlik ənənələrimizin yaşadılması və təbliğinə verdiyimiz önəmi özündə ehtiva edir.
Zakir İbrahimov “Xəzinə” muzey ekspozisiyasının həm vətəndaşlarımızın, həm də ölkəmizə səfər edən xarici qonaqların daim ziyarət etdiyi turistik obyektlərdən birinə çevriləcəyinə, nümayiş etdirilən eksponatların isə ziyarətçilərin böyük marağına səbəb olacağına əminliyinə ifadə edib.
Tədbir çərçivəsində, həmçinin “AzerGold” QSC-nin İçərişəhərə həsr etdiyi qızıl sikkə kolleksiyasının təqdimatı olub.
Qeyd edək ki, “İçərişəhər” qızıl sikkə nümunəsində təkcə paytaxt Bakının deyil, ümumilikdə Azərbaycan memarlığının inciləri hesab edilən Şirvanşahlar Sarayı, Qız Qalası, Şah məscidi, Qoşa Qala qapıları, eləcə də İçərişəhərin memarlıq ansamblına daxil olan digər abidələr öz əksini tapıb.
Sonra tədbir iştirakçıları “Xəzinə” muzey ekspozisiyasında sərgilənən zərgərlik sənəti və zəngin numizmatika nümunələri ilə tanış olublar.