ABŞ və bir sıra Avropa ölkələri Ukraynanın NATO-ya üzvlüyü və Rusiyanın dondurulmuş aktivlərindən Kiyevə maliyyə yardımı göstərmək üçün istifadə imkanları ilə bağlı konsensus əldə etməyiblər. Bu barədə “The Washington Post” bir sıra Avropa, Ukrayna və Amerika rəsmilərinə istinadən məlumat yayıb.
Nəşrin yazdığına görə, ABŞ Ukraynanın Şimali Atlantika Alyansına qoşulması məsələsində ehtiyatlı olaraq qalır. Dondurulmuş Rusiya aktivlərinin Kiyevə kömək etmək üçün istifadəsinə gəlincə, ABŞ və Ukrayna bu ideyanı dəstəkləyir, Avropa ölkələri isə buna qarşıdır. The Washington Post-un qeyd edib ki, gərginləşən mübahisələr göstərir ki, ABŞ-ın Ukraynaya ayırdığı 61 milyard dollarlıq yardım hələ də vəziyyətin yaxşılaşmasına səbəb olmayıb və Kiyevin döyüş meydanında zəifliyini azalda bilməyib.
Qəzet onu da yazır ki, Avropa Parlamentinə qarşıdan gələn seçkilər Ukraynanın Avropa İttifaqına daxil olmasına şübhə ilə yanaşan ifrat sağçı siyasətçilərin mövqeyini gücləndirə biləcəyi üçün yeni fikir ayrılıqlarına səbəb ola bilər. Bundan əlavə, iyulda keçiriləcək NATO sammitində Ukraynaya çətin ki, Kiyevin can atdığı alyansa qoşulmaq üçün aydın plan təklif etsin.