Bu sözləri “Report”a müsahibəsində Laçına köçən keçmiş məcburi köçkün Yasin Həsənov deyib.

O, qeyd edib ki, bir zamanlar doğma yurdundan məcburi köçkün düşüb: “Laçını tərk edəndə 11 yaşım vardı. Oranı yük maşınının qoşqusunda tərk etməyə məcbur olmuşduq. Novxanıda keçmiş pioner düşərgəsində məskunlaşmışdıq. Bu gün 43 yaşımda ora qayıdıram”.

“Şükür Allaha. Sevincimin həddi-hüdudu yoxdur. Bu hissi ancaq yaşayanlar duya bilər. Allah xalqımızı, Qarabağın işğaldan azad olunmasında xidməti olan bütün insanları var etsin”, – Y.Həsənov əlavə edib.

Qeyd edək ki, respublikanın müxtəlif ərazilərində yataqxana, sanatoriya, keçmiş pioner düşərgəsi, yarımçıq tikililər və inzibati binalarda müvəqqəti məskunlaşmış ailələrdən ibarət növbəti köç karvanı Bakı şəhərinin Qaradağ rayonundan yola salınıb. Bu mərhələdə Laçın şəhərinə daha 20 ailə – 68 nəfər köçürülüb.

İndiyədək Laçın şəhərində 513 ailənin, yəni 1 906 nəfərin daimi məskunlaşması təmin edilib.