“Report” xəbər verir ki, bunu “Bakı Beynəlxalq Dəniz Ticarət Limanı” QSC-nin departament müdiri Xudayar Həsənli “Translogistica Caspian” sərgisi çərçivəsində keçirilən “Orta Dəhliz: perspektivlər və çağırışlar” adlı panel müzakirələrində bildirib.

Onun sözlərinə görə, Bakı Limanının gücü artırıldığı halda, əgər digər infrastrukturların potensialı aşağı olarsa bu heç bir səmərə verməz: “Baş verən geosiyasi vəziyyətlə də əlaqədar Orta Dəhliz boyu yüklərin həcmində artım oldu. Bu zaman ortaya bir sıra problemlər çıxdı. Yüklərin zamanında daşınması və koordinasiya ilə bağlı problemlər yaşadıq. Lakin bu istiqamətdə ciddi işlər görüldü. Sadaladığım problemlər aradan qaldırıldı və bunun nəticəsi olaraq ilin əvvəlindən Çindən blok qatarların qəbulu və yola salınması uğurla həyata keçirildi”.

Xatırladaq ki, Transxəzər Beynəlxalq Nəqliyyat Marşrutu Çin, Qazaxıstan, Xəzər dənizi, Azərbaycan, Gürcüstan ərazisindən keçərək Türkiyə və Avropa ölkələrinə qədər uzanan beynəlxalq nəqliyyat dəhlizidir.

2023-cü ildə bu marşrutla 2,7 milyon tondan çox yük daşınıb ki, bu da 2022-ci illə müqayisədə 86 % çoxdur. 2024-cü il üçün perspektiv plan təxminən 4 milyon tondur.