Avropa İttifaqı müdafiə və təhlükəsizlik də daxil olmaqla bir sıra sahələrdə ABŞ-dan çox asılıdır. Bu barədə Fransanın “Le Monde” qəzeti yazır.
Nəşrin fikrincə, Aİ “müdafiə məsələlərində Birləşmiş Ştatlarsız işləməkdən hələ çox uzaqdır”. Amerika tərəfinin dəstəyi olmasaydı, Aİ hər hansı bir xarici hücum zamanı “özünü müdafiə edə” bilməzdi. Bundan əlavə, Parisin analitik mərkəzi Jak Delors İnstitutunun eksperti Elvir Fabrinin fikrincə, Avropa ictimaiyyəti “həmçinin Ukraynanın təhlükəsizliyinə və dəstəyinə görə ABŞ-dan asılıdır”. Qəzet qeyd edir ki, Aİ-nin xüsusilə Kiyevə yardım məqsədilə aldığı silahların üçdə ikisi ABŞ-dan gəlir.
Le Monde-un qeyd etdiyi kimi, ABŞ-ın keçmiş prezidenti Donald Tramp noyabrda keçiriləcək prezident seçkilərində qalib gəlsə, yəqin ki, Aİ-dən belə asılılıqdan istifadə edə biləcək. Nəşrin yazdığına görə, o, yenidən seçiləcəyi təqdirdə, NATO-dakı müttəfiqlərinə yardım etməyəcəyini, lakin müəyyən şərtlər daxilində onların təhlükəsizliyini təmin etməyə hazır olduğunu bəyan edə bilər. Bu, Aİ-yə üzv dövlətlər arasında fikir ayrılığına səbəb ola bilər. (Tass)