Ermənistan parlamenti tərəfindən Beynəlxalq Cinayət Məhkəməsinin (ICC) Roma Əsasnaməsinin ratifikasiyası Rusiyaya və ya Rusiya Federasiyasının prezidentinə qarşı qeyri-dost hərəkət deyil. Bunu Ermənistan parlamentinin vitse-spikeri, Ermənistan-Rusiya parlamentlərarası komissiyasının həmsədri Akop Arşakyan deyib.
“Roma statusunun ratifikasiyası heç bir halda bizim bəzi rusiyalı həmkarlarımızın təsəvvür etdiyi kimi Rusiyaya və ya Rusiya prezidentinə qarşı qeyri-dost hərəkət deyil. Əminəm ki, Rusiya ilə münasibətlərdəki gərginliyə aydınlıq gətiriləcək və aradan qaldırılacaq”, – o qeyd edib.
Çərşənbə axşamı Ermənistan parlamenti baş nazir Nikol Paşinyanın fraksiyasının səsləri ilə BCM-nin Roma Əsasnaməsini ratifikasiya edib. Məsələnin müzakirəsini boykot edən müxalif “Ermənistan” və “Mənim namusum var” fraksiyaları iclas otağına qayıdıb, əleyhinə səs veriblər. Onlar qeyd ediblər ki, bu sənədin qəbul edilməsinin Ermənistanın maraqları ilə heç bir əlaqəsi yoxdur və geosiyasi məqsədlər güdür. Bundan əvvəl onlar bəyanat yayıblar və hakimiyyətin bu sənədi ratifikasiya etmək qərarını pisləyiblər və qeyd ediblər ki, Ermənistan hakimiyyəti bu addımı ilə onların Rusiya ilə müttəfiqlik münasibətlərini qəsdən təhlükə altına alıb və bu, ölkə üçün ağır nəticələrlə doludur. (Tass)