İyunun 25-i saat 10:00-da Azərbaycan Memarlıq və İnşaat Universitetinin (AzMİU) nəzdində Fizika-riyaziyyat təmayüllü liseyə qəbul imtahanı keçiriləcək.
AzMİU-dan AZƏRTAC-a bildirilib ki, imtahanlarda ümumi təhsil məktəbləri, lisey və gimnaziyalarda təhsil alan və təhsilini bu il bitirəcək VI-IX sinif şagirdləri iştirak edəcəklər. Qəbul imtahanı VII və VIII siniflər üçün Azərbaycan dili və riyaziyyat fənləri üzrə, digər siniflər üçün isə Azərbaycan dili, riyaziyyat və fizika fənlərindən keçiriləcək.
Test tapşırıqları VII sinfə qəbul üzrə Azərbaycan dili fənnindən 20, riyaziyyat fənnindən 30 sual olmaqla cəmi 50, VIII sinfə qəbul üzrə Azərbaycan dili fənnindən 25, riyaziyyat fənnindən 35 sual olmaqla cəmi 60, IX-X sinfə qəbul üzrə isə Azərbaycan dili fənnindən 20, riyaziyyat fənnindən 20, fizika fənnindən 20 sual olmaqla cəmi 60 sualdan ibarət olacaq.
Qeyd edək ki, sənəd qəbulu iyunun 14-dək aparılacaq. İmtahanda iştirak etmək üçün qeydiyyatdan keçmək mütləqdir. Qeydiyyat üçün 2 ədəd 3×4 fotoşəkil və şagirdin şəxsiyyət vəsiqəsinin surətini liseyə təqdim etmək lazımdır.
Ətraflı məlumat üçün əlaqə vasitələri:
Tel: 994+ (012) 539 54 48
994+ (055) 551 51 63
E-mail: lisey@azmiu.edu.az