İndoneziya bu sənədi balanslaşdırılmış hesab etmədiyi üçün İsveçrədə Ukrayna üzrə keçirilən konfransın yekun kommünikesini imzalamadı. Bu barədə ölkənin Xarici İşlər Nazirliyinin nümayəndəsinin bəyanatında deyilir.
“İndoneziya hesab edir ki, birgə kommünike hərtərəfli və balanslaşdırılmış şəkildə hazırlansaydı, daha təsirli olardı”, – Antara onun sözlərindən sitat gətirib.
Xarici İşlər Nazirliyinin nümayəndəsi onu da xatırladıb ki, İndoneziyanın Ukraynadakı vəziyyətlə bağlı əsas mövqeyi ondan ibarətdir ki, münaqişə bütün tərəflərin iştirakı ilə razılaşma və danışıqlar yolu ilə həll edilməlidir.
Ukrayna ilə bağlı konfrans Ukrayna tərəfinin təşəbbüsü ilə iyunun 15-16-da İsveçrənin Bürgenstok şəhərində keçirilib. İyunun 14-də dərc edilmiş iştirakçıların rəsmi siyahısına 91 ölkə, Serbiyanın Kosovo regionu və 8 beynəlxalq təşkilat daxildir. Forumun yekun kommünikesini 15 ölkə: Ermənistan, Braziliya, Bəhreyn, Vatikan, İraq, Hindistan, İndoneziya, İordaniya, Kolumbiya, Liviya, Meksika, Birləşmiş Ərəb Əmirlikləri, Səudiyyə Ərəbistanı, Tailand və Cənubi Afrika Respublikası imzalamayıb. (Tass)