Gürcüstanın baş naziri İrakli Kobaxidze gələn ilin əvvəlindən ABŞ-la münasibətlərin yaxşılığa doğru əhəmiyyətli dərəcədə dəyişəcəyinə əminliyini ifadə edib.
“Biz ABŞ-la münasibətləri mümkün qədər dərinləşdirmək istəyirik, bu barədə bir neçə dəfə danışmışıq. Əsas odur ki, biz qarşılıqlı addımları gözləyirik. Biz əminik ki, hardasa gələn ilin əvvəlinə kimi Gürcüstan və ABŞ arasında münasibətlərin inkişafı yaxşılığa doğru əhəmiyyətli dərəcədə dəyişəcək”, – Kobaxidze gürcü jurnalistlərə bildirib.
ABŞ Müdafiə Nazirliyi iyulun 5-də elan edib ki, 2024-cü ilin yayında planlaşdırılan “Layiqli tərəfdaş” Gürcüstan-Amerika hərbi təlimləri strateji münasibətlərə yenidən baxılması səbəbindən qeyri-müəyyən müddətə təxirə salınıb. ABŞ Müdafiə Nazirliyi təlimlərin təxirə salınması qərarını Gürcüstan hakimiyyətinin ABŞ və Qərbin Ukraynadakı vəziyyətlə əlaqədar Rusiyaya təzyiqi artırmaq üçün “ikinci cəbhə” açmaq cəhdlərini elan etməsi ilə əsaslandırıb. Amerika tərəfi belə bəyanatların yalan olduğunu iddia edir. Bununla əlaqədar ABŞ hakimiyyəti qərara gəlib ki, indi Gürcüstanda tammiqyaslı hərbi təlimlər keçirmək üçün münasib vaxt deyil. (Tass)