Hindistan istehsalı olan öskürək siropunun 300-dən çox nümunəsinin tərkibində təhlükəli toksinlər olduğuna görə keyfiyyət standartlarına cavab vermədiyi müəyyən edilib. Bu barədə “The Economic Times” qəzeti Hindistanın Səhiyyə və Ailə Rifahı Nazirliyinin hesabatına istinadən məlumat yayıb.
İdarədən verilən məlumata görə, Dərman Vasitələrinə Nəzarət Standartlarına Nəzarət Mərkəzi Təşkilatı bu dərman vasitələrinin 7 mindən çox nümunəsindən 335-də dietilenqlikol və etilenqlikol təhlükəli maddələrin olduğunu müəyyən edib.
2023-cü ilin may ayında Hindistanın Baş Narkotik Nəzarətçisi hökumət laboratoriyalarına ixrac üçün nəzərdə tutulan öskürək siropu nümunələrinin keyfiyyətinin məcburi yoxlanılmasına göstəriş verdi. Xarici Ticarət Baş İdarəsi ixracatçılardan bu dərmanlar üçün analiz sertifikatı təqdim etməyi tələb edib.
Ümumdünya Səhiyyə Təşkilatının (ÜST) 2022-ci ilin oktyabrında Hindistanın Maiden Pharmaceuticals şirkəti tərəfindən hazırlanmış dörd uşaq dərmanının Qambiyada 66 uşağın ölümü ilə əlaqəli ola biləcəyi barədə məlumatından sonra Hindistan səlahiyyətliləri öskürək siroplarının keyfiyyətinə nəzarəti gücləndirdi. ÜST müəyyən edib ki, prometazin ağız məhlulu, uşaq öskürək siropları Kofexmalin və Makoff və şirkətin Sonipat müəssisəsində istehsal etdiyi soyuq şərbət Magrip N tərkibində uşaqlarda böyrəklərin zədələnməsinə və onların ölümünə səbəb ola biləcək toksinlər var. (Tass)