Bakı Mühəndislik Universitetinin (BMU) sənaye mühəndisliyi ixtisasının (ingilis bölməsi) bakalavriat səviyyəsi üzrə builki məzunu Elvin Nəsirov Rusiya Nəqliyyat Universitetinin elan etdiyi təhsil təqaüd proqramının qalibi olub.
BMU-dan AZƏRTAC-a bildirilib ki, nəqliyyat sahəsində gənc milli kadrların hazırlanması məqsədini daşıyan proqram Azərbaycan Respublikası Rəqəmsal İnkişaf və Nəqliyyat Nazirliyi ilə Rusiya Federasiyasının Nəqliyyat Nazirliyi arasında əməkdaşlığa əsasən həyata keçirilir. Təhsil haqqı tam şəkildə təqaüd proqramı çərçivəsində ödənilir. Eyni zamanda, qaliblər aylıq təqaüdlə təmin olunurlar.
BMU məzunu təhsilini Rusiya Nəqliyyat Universitetində nəqliyyat proseslərinin texnologiyaları ixtisası üzrə magistratura səviyyəsində davam etdirəcək. E.Nəsirov BMU-da aldığı yüksək təhsilin və qazandığı biliklərin bu uğuru əldə etməsinə imkan yaratdığını bildirib.
Qeyd edək ki, Rusiya Nəqliyyat Universiteti nəqliyyat sahəsi üzrə aparıcı ali məktəb olmaqla bərabər, həm də ən böyük sənaye universitetidir. Universitet nəqliyyat sənayesinin inkişafında kadr təminatı və elmi dəstək üçün baza platforması rolunu oynayır.