ABŞ prezidenti Co Bayden Pentaqonun rəhbəri Lloyd Ostinin 11 sentyabr 2001-ci il terror aktlarını təşkil etməkdə ittiham olunan üç nəfərlə müqaviləni ləğv etmək qərarına təsir etməyib. Bunu Ağ Evin mətbuat katibi Karine Jan-Pyer jurnalistlər üçün keçirdiyi növbəti brifinqdə deyib.
“Bizim 11 sentyabr [terror aktları] ilə bağlı bu razılaşmanın ləğvi ilə heç bir əlaqəmiz yoxdur. Bu qərarı müdafiə katibi verib, prezident ona tam etimad göstərir”, – o, Baydenin Ostinə sözügedən razılaşma ilə bağlı hər hansı təsiri olub- olmaması və Pentaqon rəhbərinin onu ləğv etmək niyyəti barədə prezidentə məlumat verib-verməməsi sualına cavab verərkən deyib.
Bundan əvvəl “The New York Times” Pentaqon mənbələrinə istinadən xəbər vermişdi ki, 2001-ci il sentyabrın 11-də törədilən terror aktlarının əsas təşkilatçısı hesab edilən Xalid Şeyx Məhəmməd və onun iki şəriki ölüm cəzasının ömürlük həbslə əvəzlənməsi müqabilində günahlarını etiraf etməyə razılaşıblar. Hər üçü ABŞ-ın Kubadakı Quantanamo bazasında həbsxanada saxlanılır. Daha sonra Pentaqonun rəhbəri üç müttəhimlə sövdələşməni şəxsən nəzərdən keçirəcəyini bildirib və ondan xəbərsiz olaraq əldə edilmiş məhkəməyə qədərki razılaşmanı ləğv edib. (Tass)