“Bu gün Laçın şəhərində Əlaqələndirmə Qərargahının İdarələrarası Mərkəzinin nəzdində fəaliyyət göstərən İşçi qrupunun səyyar iclası baş tutacaq. Əlaqələndirmə Qərargahının nəzdində fəaliyyət göstərən işçi qrupu mütamadi olaraq səyyar toplantılar keçirir. Laçına gedərkən əməliyyat sahələrinə baş çəkdik”.
APA-nın Qarabağ bürosu xəbər verir ki, bu sözləri jurnalistlərə açıqlamasında Azərbaycan Minatəmizləmə Agentliyinin (ANAMA) İdarə Heyətinin sədri Vüqar Süleymanov deyib.
O bildirib ki, Cəbrayıl rayonunun Sarıcalı, Cocuq Mərcanlı kəndlərində aparılan mina təmizləmə əməliyyatlarının gedişi ilə tanış olduq.
ANAMA sədri qeyd edib ki, indiyədək 156 min hektara yaxın ərazi mina və partlamamış hərbi sursatlardan təmizlənib. Həmçinin ərazilərdən 151 mindən yuxarı mina və partlamamış hərbi sursat aşkar olunub.
V.Suleymanov mina qurbanları ilə də bağlı danışarkən bunları deyib: “Təəssüf ki, mina qurbanlarının sayı artır. Dinamika aşağı düşsə də, yenə hadisələr baş verir. İndiyə qədər bu partlayışlar nəticəsində 69 nəfər həlak olub, ümumlikdə 377 nəfər mina qurbanı olub”.
V. Süleymanov qeyd edib ki, ilin sonuna kimi Ağdama köç nəzərdə tutulduğundan əsas hədəf həmin əraziləri mina və partlamamış hərbi sursatlardan təmizləməkdir.