Azərbaycanın müstəqil xarici siyasət yürütməsi birmənalı olaraq heç kimdə şübhə doğurmur. Dünya ictimaiyyəti İkinci Qarabağ müharibəsindən əvvəlki və sonrakı proseslərdə şahid oldu ki, Azərbaycan öz milli maraqlarına söykənən xarici siyasət strategiyası həyata keçirir. Bu, özünü xüsusilə də balanslı xarici siyasətdə bərabərhüquqlu formada göstərir. Ölkəmiz həm qonşu, həm də regiondan kənar dövlətlərlə münasibətlərə xüsusi önəm verir. Bundan əlavə, ölkəmiz Avropa İttifaqı (Aİ), Avropa Şurası, NATO və sair kimi Qərb təsisatları, o cümlədən Şərq və Afrika ölkələri və təşkilatları ilə də müxtəlif formatlarda sıx əməkdaşlıq edir. Təkcə bir istiqamətdə qurulan siyasi strategiya dövlət maraqlına tam olaraq cavab verə bilməz. Bu baxımdan da düşünürəm ki, bizim çoxşaxəli münasibətlərimiz olduqca önəmlidir.
Bu sözləri AZƏRTAC-a açıqlamasında Beynəlxalq Münasibətlər və Diplomatiya Araşdırmaları Mərkəzinin rəhbəri, politoloq Samir Hümbətov söyləyib.
O bildirib ki, çoxşaxəli diplomatik strategiya həyata keçirən Azərbaycanın dünyadakı nüfuzlu aktorlarla olan münasibətləri də ölkəmizin iqtisadi və təhlükəsizlik maraqlarına cavab verir. Diqqətçəkən əsas məqam isə Azərbaycanın BRİCS kimi böyük təşkilata üzv olmaq istəyidir.
“Azərbaycan Şanxay Əməkdaşlıq Təşkilatında (ŞƏT) aktiv şəkildə iştirak edir və yaxın illərdə maraqlarımıza cavab verəcəyi təqdirdə ölkəmiz ŞƏT-də də təmsil oluna bilər. Bunun da əsas səbəbləri Azərbaycanın enerji resursları ilə zəngin olması, alternativ və bərpaolunan enerji mənbələrindən istifadə üçün layihələr həyata keçirməsidir. Bu məqsədlə günəş və külək enerjisindən istifadə edilməsi və onun ixracı nəzərdə tutulur.
Bundan əlavə, Azərbaycandan keçən Şərq-Qərb və Şimal-Cənub nəqliyyat dəhlizləri, Çinin “Bir kəmər-bir yol” layihəsi ölkəmiz üçün önəmlidir və milli maraqlarımız kontekstindən dəyərləndirilməlidir”, – deyə politoloq vurğulayıb.