Rusiyanın Həştərxan şəhərində ən yaxşı jurnalist yazısına görə “Sərhədsiz Xəzər” beynəlxalq müsabiqəsinə yekun vurulub. Qaliblər arasında AZƏRTAC-ın Rus dilində informasiya baş redaksiyasının redaktoru Nərminə Məmmədovanın da adı var. O, “COP29 и мелеющий Каспий: почему важно спасти «пространство мира и стабильности» от высыхания?” sərlövhəli məqaləsinə görə “İnsan və dəniz” nominasiyasında mükafata və ikinci yer uğrunda diploma layiq görülüb.Qaliblərin mükafatlandırılması mərasimi IX Xəzər Media Forumu çərçivəsində Həştərxan Opera və Balet Teatrında baş tutub.Bu il jurnalistlər üçün “Sərhədsiz Xəzər” müsabiqəsi 11-ci dəfə keçirilib, iştirakçılardan 130-dan çox məqalə qəbul edilib. Yekunda Həştərxan Gənclər Teatrının bədii rəhbəri, Rusiyanın Əməkdar artisti Sergey Taraskinin rəhbərlik etdiyi münsiflər heyəti 5 nominasiya – “FotoXəzər”, “İnsan və dəniz”, “Xəzər dənizi ölkələrinin kəşfi”, “Xəzər dənizi – sağlamlıq ərazisi” və “Yeni baxış” nominasiyaları üzrə qalibləri seçib, həmçinin Qran-Pri və bir sıra xüsusi mükafatlar təqdim edib.Ümumilikdə, bu illər ərzində “Sərhədsiz Xəzər” müsabiqəsində Xəzər regionunun 500-dən çox media orqanının müəllifləri və Xəzəryanı ölkələrin blogerləri iştirak ediblər.
