Ukrayna prezidenti Vladimir Zelenski Qərb müttəfiqlərindən hərbi yaşda olan qaçqınların ölkəyə qaytarılmasında kömək istəyib, lakin rədd edilib. Bu barədə Bloomberg məlumat yayıb.
Onun məlumatına görə, Ukrayna prezidenti “ikitərəfli görüşlərdə hərbi yaşda olan Ukrayna vətəndaşlarının geri qaytarılması ilə bağlı müttəfiqlərdən kömək istəyib”. Qeyd olunur ki, “Polşadan Macarıstana qədər olan ölkələrin siyasətçiləri” Zelenskiyə rədd cavabı verib və Rusiya ilə “münaqişənin davam etdiyi müddətdə qaçqınları geri qaytarmayacaqlarını” bildiriblər. Ukrayna prezidentinin bu cür müraciətlər etdiyi ölkələrin ətraflı siyahısı verilmir.
Bloomberg vurğulayır ki, imtinanın səbəbi kimi Mərkəzi və Şərqi Avropa ölkələrinin, xüsusən də Polşa və Çexiyanın üzləşdiyi işçi çatışmazlığı ola bilər. “Gəlin etiraf edək ki, bir çox çex şirkətləri ukraynalı qaçqınların bacarıqlarından və zəhmətindən asılıdır. Məsələn, Ukraynadan gələn işçilər olmasaydı, tikinti sənayesi tamamilə dayanardı”, – Çexiya biznes strukturlarından birinin rəhbəri və Çexiyanın Avropa məsələləri üzrə keçmiş dövlət katibi Tomaş Prouza vurğulayıb.
6 milyondan çox ukraynalı qaçqın xaricdə qalmaqda davam edir, Bloomberg BMT-nin Qaçqınlar üzrə Ali Komissarlığının İdarəsinə istinadən qeyd edir. 2024-cü ildə daha 400 min insan Ukraynanı tərk edə bilər, agentlik Ukrayna Milli Bankının hesabatına istinadən xəbər verir.