Misir və İsrail arasında münasibətlər 1979-cu il sülh müqaviləsindən bəri ən aşağı nöqtədədir. Münasibətlərin pisləşməsinə səbəb Misirlə Qəzza zolağını birləşdirən Rəfah sərhəd-keçid məntəqəsinə nəzarət məsələsində fikir ayrılığı olub, Əmirliyin “ The National” nəşri mənbələrə istinadən yazır.
Onların sözlərinə görə, son 48 saat ərzində Misir və İsrail nümayəndələri Qahirədə bir sıra məsləhətləşmələr aparıblar və bu məsləhətləşmələrdə Misir tərəfi İsrail qüvvələrinin Rəfah keçid məntəqəsində olmasına dözməyəcəyini bəyan edib. Misir həmçinin İsraili sərhəddə İsrail qoşunlarının yerləşdirilməsini qadağan edən ikitərəfli razılaşmaları pozmaqda ittiham edib.
“İsraillilər orada qüvvələri saxlamaqda israr ediblər və orada məhdud sayda hərbçilərin yerləşdiriləcəyini göstərən real vaxt rejimində peyk görüntülərini paylaşacaqlarına söz veriblər”, – The National bir mənbədən sitat gətirib. Lakin Misir nümayəndələri “bu planı qəti şəkildə rədd etdilər və əvəzində ABŞ və ya BMT qüvvələrinin orada yerləşdirilməsini təklif etdilər”. İsrail də öz növbəsində Misir tərəfinin təklifini rədd edib, nəşrin həmsöhbəti əlavə edib. (Tass)