Azərbaycan Respublikası Gənclər Fondunun təşkilatçılığı ilə Masallı rayonunda Səyyar Gənclər Xidməti layihəsi çərçivəsində “Narkomaniyaya yox deyək!” adlı təlim təşkil edilib.Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının daimi fəaliyyət göstərən işçi qrupundan AZƏRTAC-a verilən məlumata görə, tədbirin açılış günü Gənclərin İnkişaf və Karyera Mərkəzinin baş direktoru Azər Əliyev, Dövlət Komissiyasının daimi fəaliyyət göstərən İşçi qrupunun baş məsləhətçisi Şahin İsmayılov, Masallı Rayon İcra Hakimiyyətinin başçısı Araz Əhmədov və digər dövlət qurumlarının nümayəndələri iştirak ediblər.Təlim zamanı gənclərin narkotik asılılığı probleminə dair biliklərinin artırılması məqsədilə risk amilləri, psixoaktiv maddələrin xüsusiyyətləri və onların sağlamlığa zərərli təsiri, gənclərin asudə vaxtlarının səmərəli təşkili, “802 – Qaynar xətt”in fəaliyyət istiqaməti və digər məsələlər barədə ətraflı məlumat verilib, gəncləri maraqlandıran suallar ətrafında müzakirələr aparılıb.Təlimin yekununda Dövlət Komissiyasının daimi fəaliyyət göstərən İşçi qrupu tərəfindən hazırlanmış “Narkotiklər haqqında həqiqəti bilin”, “Marixuana haqqında həqiqət” və “Psixotrop maddələr haqqında həqiqət” adlı zəruri təbliğat materialları gənclərə təqdim edilib.
