Azərbaycan Dövlət Yuğ Teatrında yeni mövsümün açılışı ilə əlaqədar mətbuat konfransı keçirilib.Teatrdan AZƏRTAC-a bildirilib ki, tədbir teatrın ötən mövsüm ərzində fəaliyyətini əks etdirən videoçarxın nümayişi ilə başlayıb.Görüşdə çıxış edən teatrın ədəbi hissə müdiri Elçin Cəfərov sənət ocağının reallaşdırdığı layihələr, hazırlanan tamaşalar haqqında məlumat verib. “Yalnız teatr-konsert müəssisəsi kimi fəaliyyət göstərməklə kifayətlənməyən, Azərbaycan teatr mədəniyyətinin inkişafı üçün mühüm layihələrə imza atan Yuğ Dövlət Teatrı ötən mövsüm ərzində bir sıra layihələrdə tərəfdaş kimi tanınıb. Xüsusilə “Characters Müasir Dramaturgiya Festivalı” növbəti mövsümlərdə də milli teatr sənətinin inkişafına təkan verəcək belə layihələri davam etdirəcək”,- deyə o əlavə edib.Direktor İslam Həsənov qeyd edib ki, teatrın qarşıdakı aylarda Əbdülqəni Əliyevin quruluşunda hazırlanmış “Asılqan” adlı səhnə əsəri ilə Estoniyada qastrol səfərində olacağı gözlənilir.Tədbirdə doqquz il Azərbaycan Dövlət Kukla Teatrının binasında məskunlaşmış Yuğ Teatrının bina məsələsinə də bir daha toxunulub. Həmçinin Azərbaycan günləri çərçivəsində Özbəkistanda nümayiş olunmuş “Mənəm, mən” tamaşası xüsusilə qeyd edilib.Baş rejissor Mikayıl Mikayılov teatrda yeni hazırlanacaq tamaşalar barədə məlumatlar verərək, qeyd edib ki, 2024-2025-ci teatr ili çərçivəsində Yuğ Teatrında yapon dramaturq Koki Mitaninin “Gülüş akademiyası”, azərbaycanlı dramaturq İsmayıl İmanın “Əziz ata” və “CHARACTERS Müasir Dramaturgiya” Festivalının qalibi yazıçı-dramaturq Şəbnəm Xeyrullanın “Arqon” əsərləri tamaşaya hazırlanacaq.Bununla yanaşı, teatrın ötən il xarici və yerli və qastrol səfərlərində və festivallarda iştirakı da qiymətləndirilib. Qeyd edilib ki, bu il Yuğ Teatrının 35 və teatrın yaradıcısı Vaqif İbrahimoğlunun anadan olmasının 75 illiyidir. Bununla bağlı tədbir keçiriləcək və rejissorun “Albalı bağı” tamaşası nümayiş olunacaq.
