Azərbaycan Memarlıq və İnşaat Universiteti (AzMİU) ilə “TCS” şirkətinin birgə əməkdaşlığı çərçivəsində bu ali məktəbin pedaqoji heyəti üçün “Keyfiyyət təminatı və keyfiyyətə nəzarət” adlı təlimə start verilib.AzMİU-dan AZƏRTAC-a bildirilib ki, təlim 15 dərsdən ibarətdir. Tərəfdaş şirkətin təsisçisi və direktoru peşəkar təlimçi Anar Məlikov tərəfindən tədris olunacaq dərslərə ümumilikdə universitetin 35 müəllimi qoşulub.Təlimdə müəllimlər keyfiyyət təminatı və keyfiyyətə nəzarət istiqamətində qabaqcıl beynəlxalq standartların tələb etdiyi müasir bacarıq və səriştələrə yiyələnəcəklər. Beləliklə, birgə əməkdaşlığa əsaslanan təlim AzMİU-da keyfiyyətin idarə edilməsi fənnindən dərs aparan müəllimləri təkmilləşdirmək, tədrisin keyfiyyətini yüksəltmək, əmək bazarının gözləntilərini qarşılamaq, keyfiyyət mütəxəssislərinin çatışmazlığını aradan qaldırmaq istiqamətində ciddi irəliləyiş yaradacaq.Yekunda şirkət müəllimlərin təlimi mənimsəmə səviyyəsini qiymətləndirəcək. Kursu müvəffəqiyyətlə tamamlayan və uğurlu nəticə göstərən iştirakçılara beynəlxalq sertifikat və diplomlar təqdim olunacaq. Bununla da tələbələr kursu tamamlayan beynəlxalq sertifikatlı müəllimlərdən dərs almaqla peşəkar mütəxəssisə çevriləcək.İştirakçılar sonda şirkət tərəfindən dərs vəsaitləri və materiallarla təmin ediləcək.
