Azərbaycan Dövlət Milli Gənc Tamaşaçılar Teatrının yaradıcı kollektivi yazıçı Pərvin Nurəliyevanın “Cırtdanino” pyesinin oxunuş məşqlərinə başlayıb.
Teatrdan AZƏRTAC-a bildirilib ki, yeni qurulan tamaşada rolları Əməkdar artistlər Şəfəq Əliyeva, Mehriban Abdullayeva, Elnur Hüseynov və digər aktyorlar ifa edəcəklər.
Birhissəli tamaşanın quruluşçu rejissoru Elşad Rəhimzadə, rəssamı Nisə Həsənova, musiqi tərtibatçısı Aygül Quliyeva, rejissor assistenti Sona Məhərrəmovadır. Tamaşanın plastik həlli Ceyhun Dadaşova aiddir.
Əsər “Cırtdan” xalq nağılının motivləri əsasında yazılıb.
Tamaşa müddətində balaca izləyicilərimiz Cırtdan, nağılın digər qəhrəmanları, həmçinin yad planetlərdən gəlmiş Nino adlı robotla tanış olacaqlar. Macəralarla dolu səhnə əsəri müasir quruluşla uşaqları dostluğa və sülhə səsləyəcək.