İraq Kürdüstanı heç bir halda heç kimin öz ərazisindən istifadə edərək İranı təhdid etməsinə icazə verməyəcək. Bunu muxtariyyət prezidenti Neçirvan Bərzani Ərbildə iranlı həmkarı Məsud Pezeşkianla danışıqlardan sonra deyib.
“İraq Kürdüstanı heç bir halda İrana qarşı istifadə edilməməlidir və mövcud olan bütün çətinlikləri birlikdə həll etməliyik” – SNN telekanalı onun sözlərini sitat gətirir. Bərzaninin qeyd etdiyi kimi, Pezeşkianla görüşdə əsas diqqət ikitərəfli münasibətlərin inkişafına, xüsusilə də təhlükəsizlik sektorunda əməkdaşlıq məsələlərinə yönəldilib. Muxtariyyət prezidentinin sözlərinə görə, İran icra hakimiyyəti başçısının bölgəyə səfəri tarixi əhəmiyyət kəsb edir.
Pezeşkianın İraqa səfəri onun İran prezidenti kimi ilk rəsmi xarici səfəridir. İRNA agentliyinin məlumatına görə , İran prezidenti sentyabrın 11-dən 13-dək bu üç günlük səfər çərçivəsində Bağdad, Ərbil və Bəsrə şəhərlərinə səfər edəcək. Sentyabrın 11-də İran və İraq tərəflərinin nümayəndələri prezident Məsud Pezeşkian və İraqın baş naziri Məhəmməd əl-Sudaninin iştirakı ilə ölkələr arasında iqtisadiyyat və ticarət, kənd təsərrüfatı, mədənçıxarma, sosial sahələr üzrə 14 anlaşma memorandumu imzalayıblar.