Tayvanın Rəqəmsal İnkişaf Təşkilatının rəhbəri Huanq Yannan bildirib ki, adada dövlət qurumlarına və özəl müəssisələrə məxsus 45 internet saytı NoName057 haker qrupu tərəfindən kiberhücumlara məruz qalıb. Bu barədə Tayvan Mərkəzi Xəbər Agentliyi məlumat yayıb.
Huang Yannan iddia edib ki, hücum edənlər DDoS hücumlarını həyata keçirmək üçün zərərli proqramla yoluxmuş kompüterlərdən istifadə ediblər. Xüsusilə, dövlət qurumlarının, maliyyə şirkətlərinin, Tayvan Birjasının, Sonşan Beynəlxalq Hava Limanının, vergi və statistika departamentlərinin, eləcə də bankların internet saytları və serverləri kiberhücuma məruz qalıb. O, DDoS hücumu nəticəsində hakerlərin heç bir məlumatı oğurlaya və ya silə bilmədiklərinə diqqət çəkib.
2023-cü ildə NoName057 haker qrupu Avropa infrastrukturuna kiberhücumlarda ittiham olunub: Çexiya prezidentliyinə namizədlərin, eləcə də ölkə banklarının internet saytlarına hücumlar qeydə alınıb. Thales ekspertləri bildiriblər ki, bu qrup Fransa Milli Assambleyasının saytına hücum edib, Hollandiyanın RTL telekanalı isə onu Rotterdam limanına kiberhücumlarda ittiham edib. Bu ilin fevralında qrup Finlandiyada internet saytlarına hücumlar elan edib, yayda isə hakerlər krallığın müxtəlif yerlərində fermerlərin etirazları ilə həmrəy olaraq İspaniyanın müxtəlif dövlət qurumlarının internet səhifələrini sındırmağa cəhd ediblər. (Tass)