ABŞ prezidenti Co Bayden milli təhlükəsizlik müşavirlərinə bildirib ki, Qəzza zolağında atəşkəsə nail olmaq onun səlahiyyət müddətinin qalan hissəsi üçün prioritet məsələyə çevrilib. Bu barədə adı açıqlanmayan mənbələrə istinadən “Politico” qəzeti yazıb.
Onların məlumatına görə, dövlət başçısı hesab edir ki, bu yolla özü də “sülhpərvər” kimi tarixə düşəcək və eyni zamanda Demokratlar Partiyasından prezidentliyə namizəd Kəmalə Harrisin qalib gəlməsini asanlaşdıra biləcək. Bununla belə, mənbələrə görə, Vaşinqtonun Qəzza razılaşması ilə bağlı irəliləyişinə iki əsas problem mane olur. Birincisi, İsrail öz kontingentinin Misirlə sərhədə yaxın hərbisizləşdirilmiş zonada mövcudluğunu saxlamağı tələb edir və Fələstin radikal HƏMAS hərəkatı bu tələbə güzəştə getməkdən qəti şəkildə imtina edir. İkincisi, fələstinli əsirlərin israilli girovlarla dəyişdirilməsinin həcmi və vaxtı ilə bağlı İsraillə Həmas arasında ciddi fikir ayrılıqları var.
Buna baxmayaraq, nəşrin mənbələri bildirir ki, prezident milli təhlükəsizlik müşavirləri ilə görüş təşkil edib və onları “son uğursuzluqlara məhəl qoymamağa” və barışıq əldə etmək üçün münaqişənin hər iki tərəfi və vasitəçilərlə işləməyə davam etməyə çağırıb. Bununla belə, Bayden administrasiyasının rəsmiləri münaqişənin hər iki tərəfində öhdəliklərin olmaması səbəbindən Qəzza sövdələşməsinin yaxın gələcəkdə bağlanacağına şübhə ilə yanaşırlar. (Tass)