ABŞ Yaxın Şərqə əlavə üç qırıcı eskadrilya və hücum təyyarəsi göndərməyə hazırlaşır. Bu barədə adı açıqlanmayan Amerika rəsmilərinə istinadən Air Force and Space Magazine nəşri məlumat yayıb .
Nəşrin məlumatına görə, söhbət F-16 Fighting Falcon və F-15E Strike Eagle qırıcılarının iki eskadrilyasından, həmçinin A-10 Thunderbolt II hücum təyyarələrinin bir eskadrilyasından gedir. Mənbələr jurnala bildiriblər ki, Birləşmiş Ştatlar həmçinin bölgədəki qırıcıların və hücum təyyarələrinin ümumi sayını artırmaq üçün artıq Yaxın Şərqdə hava bölmələrinin qalma müddətini uzatmağa qərar verib.
Jurnal xatırladıb ki, aprel ayında Amerika F-15E və F-16-lar İsrailə raket və pilotsuz təyyarələrin kütləvi hücumunu dəf etməyə kömək edib, 80-ə yaxın pilotsuz təyyarəni vurub.
Sentyabrın 30-da Pentaqonun mətbuat katibinin müavini Sabrina Sinq brifinqdə jurnalistlərə bildirib ki, Yaxın Şərqə əlavə təyyarə və “daha bir neçə min” Amerika əsgəri göndəriləcək. (Tass)