Azərbaycan Milli Elmlər Akademiyası Nizami Gəncəvi adına Ədəbiyyat İnstitutunun Elmi şurasının qərarı ilə Mikayıl Azaflının “Haqq aşığı yaranıbdı qəm çəkə” adlı şeirlər kitabı işıq üzü görüb. Aşığın 100 illik yubileyinə həsr olunan kitabı institutun Azərbaycan şifahi xalq ədəbiyyatı və yazılı abidələr şöbəsinin baş elmi işçisi filologiya elmləri doktoru, professor Qəzənfər Paşayev və aşığın qızı Maral Azaflı tərtib ediblər.
İnstitutdan AZƏRTAC-a bildirilib ki, “Mikayıl Azaflının keşməkeşli həyatı və sənət dünyası” başlıqlı əhatəli ön sözün müəllifi də Əməkdar elm xadimi Qəzənfər Paşayevdir. Kitabda ustad aşıq Mikayıl Azaflının seçmə şeirləri toplanıb. Digər aşıq kitablarından fərqli olaraq bu kitabda ilk dəfə oxuculara anlaşıqlı olsun deyə hər şeir şəklindən əvvəl professor Qəzənfər Paşayev həmin növ haqqında qısa məlumat verib.
Toplunun redaktoru Əməkdar elm xadimi professor Məhərrəm Qasımlı və aşığın qızı Gülarə Azaflıdır. Rəyçiləri Xalq şairi Zəlimxan Yaqub və akademik Muxtar İmanovdur.