Azərbaycanda “Yaşıl dünya naminə həmrəylik ili” çərçivəsində bir çox tədbirlər keçirilir. Ən böyük tədbir isə noyabrda Bakıda keçiriləcək COP29 konfransıdır. Konfransa 70-80 min qonağın gəlməsi gözlənilir.AZƏRTAC xəbər verir ki, bunu Kataliz və Qeyri-üzvi Kimya İnstitutunun baş direktoru akademik Dilqəm Tağıyev oktyabrın 7-də Enerjinin saxlanması və çevrilməsi üçün materiallar üzrə VIII beynəlxalq elmi simpoziumda çıxışı zamanı söyləyib.Akademik vurğulayıb ki, bu gün qlobal problemlərdən biri enerji ilə bağlıdır: “Nahaq yerə deməyiblər ki, kim enerjiyə sahibdirsə o, dünyaya hakimdir. Bu gün keçirilən VIII beynəlxalq simpozium aktual və qlobal məsələlərə həsr olunub. Bərpaolunan enerji ilə bağlı dünyada bir çox tədqiqatlar aparılır. Azərbaycanda da yeni Günəş və külək elektrik stansiyalarının gələn ildən işə salınması gözlənilir. Onların ümumi gücü təxminən 240 meqavatdır”.O vurğulayıb ki, 2030-cu ilə qədər bərpaolunan enerjinin ümumi gücünün 1850 meqavata çatdırılması nəzərdə tutulur.
