ABŞ prezidenti Co Bayden administrasiyası İsraildən İranın son raket hücumlarına cavab olaraq ölkənin İranın nüvə və neft obyektlərinə hücum etməyəcəyinə dair zəmanət alıb. Bu barədə mənbələrə istinadən Associated Press (AP) məlumat yayıb.
Onlar bildiriblər ki, THAAD raketdən müdafiə sistemini İsrailə və onu saxlamaq üçün 100-ə yaxın ABŞ əsgərinin göndərilməsi İranın mümkün cavabı və digər təhlükəsizlik təhdidləri ilə bağlı İsrailin narahatlığını azaltmağa kömək edib. Lakin mənbələr bu zəmanətlərin mütləq olmadığı və vəziyyətin dəyişə biləcəyi barədə xəbərdarlıq ediblər.
Onlar həmçinin qeyd ediblər ki, İsrailin keçmişdə bu cür təminatlara əməl etməsi mübahisəli olub və çox vaxt ölkənin daxili siyasi vəziyyətindən asılı olub. Mənbələrin dediyinə görə, son nümunə İsrailin keçən ay Livanda müvəqqəti atəşkəs üçün ABŞ-Fransa təşəbbüsünü dəstəkləmək vədidir. Lakin bu vədlərdən iki gün sonra İsrail Hizbullah lideri Həsən Nəsrullahı öldürən böyük hava hücumu təşkil etdi. (Tass)