Hava hücumundan müdafiə sisteminin olmaması Böyük Britaniyanı potensial düşmənin raket hücumlarına qarşı həssas edir. Bu barədə “i” qəzeti Britaniya parlamentinin İcmalar Palatasının müdafiə komitəsinin keçmiş sədri Tobias Elvuda istinadən məlumat yayıb.
O, hipersəsli raket hücumu zamanı Britaniyanın hava hücumundan müdafiə sisteminin “aşılacağını” və Londonu kütləvi bombardman riski ilə üz-üzə qoyacağını bildirib. Bununla bağlı Ellvud qeyd edib ki, Böyük Britaniya kritik infrastrukturu qorumaq üçün İsrailin Dəmir Qübbəsinə bənzər öz hava hücumundan müdafiə sisteminin yaradılmasına sərmayə qoymalıdır.
Onu müxalifətdə olan Mühafizəkarlar Partiyasından olan kölgə müdafiə naziri Ceyms Kartlic dəstəkləyib və o, Leyboristlər hökumətini hava hücumundan müdafiə sistemləri və döyüş sursatlarının istehsalını sürətləndirməyə çağırıb. O, hipersəs raketlərinin inkişafı və pilotsuz uçuş aparatlarının geniş yayılmasının Britaniyanın hava hücumundan müdafiə sisteminin gücləndirilməsinə əlavə investisiya tələb etdiyinə diqqət çəkib. Nəşr xatırladıb ki, oktyabrın 1-də Kral Hərbi Hava Qüvvələri İrandan İsrail istiqamətində atılan qanadlı raketləri vura bilməyib.