Ölkəmizdə səfərdə olan Türkiyə cəfərilərinin rəhbəri Səlahaddin Özgündüz Azərbaycan İlahiyyat İnstitutunu (Aİİ) ziyarət edib, ali təhsil müəssisəsinin tələbə və müəllim kollektivi ilə görüşüb.İnstitutdan AZƏRTAC-a bildirilib ki, görüşdə Aİİ-nin rektoru dosent Aqil Şirinov qonağa ali təhsil müəssisəsi haqqında məlumat verib. Türkiyə-Azərbaycan qardaşlığının əbədi olduğunu deyən rektor 44 günlük Vətən müharibəsində qardaş ölkənin mənəvi dəstəyini xüsusi vurğulayıb. Aİİ rəhbəri, həmçinin Azərbaycan və Türkiyə liderlərinin dostluğunun dövlətlərimiz arasında əlaqələrin inkişafında əvəzsiz rolundan bəhs edib.Rektor daha sonra “Dünya dinləri yaşıl planet uğrunda” şüarı altında keçirilən Dini Liderlərin Qlobal Bakı Sammitinin ölkəmizdə təşkil olunmasının əhəmiyyətini diqqətə çatdırıb.Səlahaddin Özgündüz çıxışında ilahiyyat sahəsində savadlı kadrlara hər zaman ehtiyac olduğunu vurğulayıb. İctimai elmlərin, xüsusən də ilahiyyatın əhəmiyyətinə diqqət çəkən qonaq qeyd edib ki, müasir dünyanın mənəvi problemlərinin həlli sahəsində səylə çalışacaq ziyalılara, ilahiyyatçılara, mütəfəkkirlərə, cəmiyyətin önündə gedən insanlara ehtiyac var. O, XXI əsrdə islami elmlərdə dərin araşdırma aparacaq ziyalıların yetişdirilməsinin zəruri olduğunu vurğulayıb.S.Özgündüz Azərbaycan İlahiyyat İnstitutunda məzhəblərüstü tədrisin əhəmiyyətini diqqətə çatdırıb, tələbələrə gələcək fəaliyyətlərində uğurlar arzulayıb.
