Fələstin Dövlətinin prezidenti Mahmud Abbas bazar günü axşam Dohaya gəlib. Bu barədə WAFA xəbər agentliyi məlumat yayıb.
Abbasın fevralın 12-də Qətər əmiri Şeyx Təmim bin Həməd Al Tani ilə danışıqlar aparacağı və orada İsrailin Fələstin ərazilərində, o cümlədən Qəzza zolağında hərbi əməliyyatlarının dayandırılması məsələsini müzakirə edəcəyi gözlənilir.
Bundan əlavə, prezident və əmir ikitərəfli münasibətlərə dair məsələləri, onları dəstəkləmək və inkişaf etdirmək yollarını nəzərdən keçirəcəklər, WAFA qeyd edib.
Qətər son aylarda İsrail və Fələstinin HƏMAS hərəkatı arasında vasitəçi kimi çıxış edir və müharibə edən tərəflər arasında müqavilələrin bağlanmasına şərait yaradır.